Қылмыстық іс бойынша тергеуге шақырылу — кез келген азамат үшін ауыр психологиялық жағдай. Адам абдырап, қорқып, не айтарын білмей, кейде өзінің айтқан бір ауыз сөзінің кейін қылмыстық істің маңызды дәлеліне айналуы мүмкін екенін түсінбей қалады.
Сондықтан бұл кітаптың басты мақсаты — азаматты қорқыту емес, заңды білуге үйрету.
Тергеушіге шақырылған адам ең алдымен мынаны білуі керек:
Сіз тергеушінің алдында құқықтары жоқ адам емессіз. Сіз — заңмен қорғалатын процестің қатысушысысыз.
Қазақстан Республикасының Конституциясы мен Қылмыстық-процестік кодексі адамға бірқатар маңызды кепілдіктер береді.
Қылмыстық процестің негізгі мақсаты тек қылмыс жасаған адамды анықтау ғана емес, сонымен қатар ешкімді негізсіз қылмыстық қудалауға ұшыратпау, адамның құқықтары мен бостандықтарын қорғау және істің мән-жайларын объективті анықтау болып табылады.
ҚПК-нің 2-бабына сәйкес, Конституцияның жоғары заңдық күші бар. ҚПК нормалары Конституцияға қайшы келген жағдайда Конституция ережелері қолданылады.
Осы кітаптағы ең маңызды ереже:
Тергеу кезінде асықпаңыз. Түсінбеген құжатқа бірден қол қоймаңыз.
Адвокатпен кеңесіңіз.
Білмейтін нәрсеңізді ойдан шығармаңыз. Өз құқығыңызды пайдаланыңыз.